Foto: Ulttyq ulan
Jańa jyl qarsańynda Ulttyq ulannyń Bas qolbasshysy general-maıor Ańsaǵan Baltabekov merzimdi áskerı qyzmetin ótep júrgen sarbazdardyń bes armanynyń oryndalýyna sebepshi boldy.
Ásker qatarynda arnaıy saýalnama júrgizilip, sarbazdar óz tilekterin búkpesiz, ashyq jetkizgen edi. Alaıda, olar onyń is júzinde oryndalatynyn kútpese kerek. Máselen, Taraz qalasyndaǵy 5513 áskerı bóliminiń áskerı qyzmetshisi Aleksandr Mıroshın buryn-sońdy ushaqqa minip kórmegenin aıtyp, kókke kóterilýdi armandaıtynyn jazǵan. Onyń bul tilegi oryndaldy. Ushýdyń alǵashqy sátterinen-aq sarbazdyń qýanyshy men tolqýy aıqyn baıqaldy. Shynaıy baqyt, qýanysh sezimi ony búkil sapar boıy jetelep otyrdy.
Jańa jyldyq qýanysh munymen aıaqtalǵan joq. Qonǵan sátten keıin Aleksandrdy taǵy bir tosyn syı kútti, ol anasymen qaýyshty.
Sarbazdyń anasy Natalıa Mıroshına bul kúni tek ulynyń ǵana emes, óziniń de armany oryndalǵanyn jetkizdi. Sebebi áskerdegi balasymen júzdesý – jańa jylda kóp otbasylar ańsaıtyn eń qymbat syı.
Al Almaty qalasyndaǵy 5571 áskerı bóliminiń áskerı qyzmetshisi Raıymbek Baqytbek shokolad ónimderiniń qalaı daıyndalatynyn kórgisi keletinin jetkizgen. Bas qolbasshynyń jańa jyldyq tartýy retinde oǵan elimizdegi tanymal «Rahat» kondıterlik fabrıkasyna ekskýrsııa uıymdastyryldy. Sarbaz tátti ónimderdiń óndiris tehnologııasymen tanysyp, eldiń tanymal brendine aınalǵan fabrıkanyń jumysyn kózimen kórdi.
Sondaı-aq Alataý qalasyndaǵy 6654 áskerı bóliminde qyzmet etetin Dastan Nurlan jańa jyl qarsańynda búkil rotasyna merekelik kóńil kúı syılaý maqsatynda, tileýi bir jáshik mandarın dep kórsetken. Ulttyq ulan Bas qolbasshysynan kelgen sálemdemeni ol qarýlas dostarymen bólisip, bólimshege ortaq qýanysh syılady.
О́skemen qalasyndaǵy 5518 áskerı bóliminiń qatardaǵy jaýyngeri Elerbek Sultanqulov sýret salýǵa degen qyzyǵýshylyǵyn qaıta jandandyrǵysy keletinin aıtqan. Onyń tilegi kútpegen ári áserli sátte oryndaldy. Shyǵarmashylyqqa arnalǵan qural-jabdyqtar keshki tekseris kezinde tabystaldy. Bul sarbaz úshin erekshe este qalarlyq sát boldy.
Osy áskerı bólimde qyzmet etetin qatardaǵy jaýynger Júnis Qarabaevtyń tilegi de kópshiliktiń júregin eljiretti. Ol otbasynyń sýreti beınelengen shynyaıaq armandaǵan. General-maıor Ańsaǵan Baltabekov tabystaǵan bul syı sarbaz úshin týǵan úıin, jaqyndaryn alysta júrip seziletin jylýlyqty eske salatyn qymbat belgige aınaldy.
Aıta ketsek, Ulttyq ulanynda merzimdi áskerı qyzmetshiler materıaldyq turǵydan ǵana qamtamasyz etilmeıdi. Olardyń moraldyq-psıhologııalyq jaǵdaıyna da erekshe kóńil bólinedi. Árbir sarbazǵa degen qamqorlyq – qyzmettiń mańyzdy quramdas bóligi. Al jańa jyl qarsańynda oryndalǵan tilekter sarbazdarǵa áskerdegi kezeńderdiń jarqyn ári jyly esteligine aınalatyny sózsiz. Osyndaı sátterde qolbasshylyq tarapynan kórsetilgen qoldaý men janashyrlyqtyń mańyzy arta túsip, áskerı qyzmetshilerge degen qamqorlyqtyń árdaıym basty nazarda ekenin aıqyn kórsetedi.
